قصيدة شعبية بديعة ( لا اعرف اسم شاعرها )

كل ساعة انذبح من عرست لليوم
و كل ساعة انسحك باجدام تذكارك
عكب ما كفرتني بحبك المن جاي
تقرالي و ترتل سورة اعذارك
اجه وقت البرد و ادفه بيك الغير
ما الحك بعد و استانس بنارك
يلمثل النخل شامخ شجاك شبيك
خليت الغريب يلوذ باكتارك
مرات النخل من ينصعد ينباك
و انته بيوم عرسك كلي شخبارك
صدك سعفك خدر لمن اجاك الليل
صدك تمرك خلص و انطيت جمارك
دليته على روحك ما تعب وياك
ما دور عليك و داخ فجارك
و احجيلي بعد بالغيبة شنهو الصار
و احجيلك اسراري و بيهه نتشارك
لان تدري كبل كلي اصير ضماد
اذا شريان صوتك ينزف اسرارك
صغت روحي جرف حد ما حضنتك ماي
و بقى لآخر نفس بالروح تيارك
اذا ماي النهر تعلى على جرفك ليش
ترى الناعور غشك لمن اختارك
اعرفك فكرت ظنك تلوح الغيم
دشوف لوين وصلت روجة افكارك
ظنك امنت من شالك الناعور
رد ردود بيك على الجرف دارك
ما دامك اجيت و تسأل على الحال
بعيونك تعال و شوف آثارك
كل ساعة انذبح من عرست لليوم
و كل ساعة انذبح باجدام تذكارك